6. sæti

Helga Margrét Jóhannesdóttir

Helga Margrét er 31 árs Eyfirðingur, búsett í Eyjafjarðarsveit ásamt eiginmanni sínum Helga Garðari Helgasyni, blikksmið frá Grímsey. Saman eiga þau eina dóttur og einn son. Hún fékk einnig stjúpdóttur í kaupbæti með eiginmanninum. Helga er sjúkraliði og hjúkrunarfræðingur að mennt og starfar jafnframt sem pole fitness þjálfari. Í dag stundar hún mastersnám í stjórnun í heilbrigðisþjónustu við Háskólann á Akureyri og klassískt söngnám í Tónlistarskólanum á Akureyri, samhliða því að vera í fæðingarorlofi.

Gildi Helgu snúast fyrst og fremst um að allir hafi jöfn tækifæri óháð aldri, kyni, kynþætti og kynhneigð sem og félagslegum aðstæðum, fjárhag og búsetu. Hún vill berjast fyrir samfélagi þar sem við erum öll jafningjar og lifum í sátt við hvert annað og náttúruna.

Heilbrigðismálin standa Helgu nærri og vill hún byggja ofan á þann góða árangur sem þegar hefur náðst í þeim efnum undir stjórn Vinstrihreyfingarinnar – græns framboðs á líðandi kjörtímabili. Hún telur að mikilvægt sé að gera alla heilbrigðisþjónustu áfallamiðaða. Aðgengi að heilbrigðisþjónustu þarf að bæta til muna á landsbyggðunum. Tryggja þarf að sjúkdómar, efnahagur og félagslegar aðstæður hamli ekki aðgengi fólks að þjónustu sem það þarfnast og hefur rétt á; hvort sem um ræðir líkamleg veikindi, andleg veikindi eða fíknisjúkdóma. Jafnframt verður að tryggja að allir njóti sömu virðingar þegar heilbrigðisþjónusta er veitt.

Aðrir frambjóðendur