Bjarkey Olsen Gunnarsdóttir

Ég heiti Bjarkey Olsen Gunnarsdóttir, fædd árið 1965, gift Helga Jóhannssyni þjónustustjóra og eigum við þrjú börn. Ég er Siglfirðingur en flutti sextán ára í Ólafsfjörð og þar höfum við fjölskyldan átt okkar heimili. Ég er menntaður kennari og náms- og starfsráðgjafi og starfaði í grunnskólanum í Fjallabyggð og Menntaskólanum á Tröllaskaga áður en ég var kjörin á þing árið 2013. Við hjónin höfum staðið í margskonar smárekstri meðfram annarri vinnu og síðast rekstri veitinga-, kaffi- og gistihúss.

Áhugamálin fyrir utan pólitíkina eru margs konar útivist, hlaup, skíðaganga og að ganga á fjöll og svo get ég gleymt stað og stund við lestur góðra bóka.

Í gegnum árin hef ég gegnt ýmsum trúnaðarstörfum fyrir Vinstri græn. Ég sat til dæmis lengi í stjórn hreyfingarinnar og var einnig formaður svæðisfélags og kjördæmisráðs og gjaldkeri þess. Á þessu kjörtímabili hef ég verið formaður þingflokksins.

Helstu pólitísku áherslur mínar varða byggðamál í hinu stóra samhengi, til dæmis er varðar heilbrigðis-, mennta-, jafnréttis- eða umhverfismálin. Auk þess er að mínu mati fjölbreytt atvinna og góðar samgöngur í hinum dreifðu byggðum forsenda þess að mannlífið blómstri. Ég vil einnig sjá til þess að kjör þeirra sem höllum fæti standa í samfélaginu verði lagfærð verulega og hef talað fyrir því á þingi.

Þessi ár á þingi hafa verið mjög lærdómsrík, oft snúin, en skemmtileg. Ég hef verið fulltrúi þingflokksins m.a. í fjárlaganefnd og allsherjar- og menntamálanefnd þar sem fjölmörg mál hafa verið til umfjöllunar er varða allt landið t.d. jafnréttismál af margvíslegum toga, löggæslan og svo auðvitað skólamálin, auk þess sem vinna í fjárlaganefnd snertir á nærfellt öllum málaflokkum.

Ég vil bjóða fram krafta mína áfram og bið hér með um stuðning ykkar til að skipa fyrsta sæti á lista okkar Vinstri grænna í Norðausturkjördæmi fyrir komandi þingkosningar.

Aðrir í forvali